- 711 -

1447. April 1.

Vnsire fruntliche dinste zuuor. Ersamen, weizen, liebin herren, besundere gonner, wir lossin ewir erbarkeit wissen, wie das vns als heyte zu nacht in der dritten stunden worhafftige warnunge von vnserm guten gonner komen ist wie das die vom Ebirszbache mit seynen helffern in starker sampnunge mit wayn, leitern, fewir pfeylen legin in meynunge eyn slos abir stat, do got vor sy, zu obirfallen, bitten wir ewir ersamkeit, begernde ewer guten frunde die vom Goltberge vnd auch die von Haynaw zu warnen, auch liebin herren lossen wir euch wissen, wie das lande vnd stete als gestern alhie durch der lande bestes willen vnd nemlichen von des tagis wegin nehste vff sante Jorgin tag zum hofe mit den Behmisschen herren zuhabin vff die mitwoche in Ostirheiligen tagin alhier kein Jawor gelegin worden ist, bitten wir ewir erbarkeit, begernde das ir die ewirn zum bunde gesworn off die genante mittwoche alhier kein Jawor senden wellet vff das man sulche vnd andere sachin moge vornemen vnd vff das beste han-deln, das lande vnd stete nicht zu schadin komen, das wollin wir fruntlichin vmb ewir erbarkeit vordinen. Gebin am sonnabunde vor Palmen anno etc. XLVIIto.
Burgermeister vnd ratmanne der stat Jawor.

Mit Rückaufschrift an den liegnitzer Rath.

Orig. Kgl. Bibl. z. Berl. Ms. Boruss. f. 568. No. 121.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866